வெளிநாட்டு வேலைவாய்ப்பு மோசடியாளர்களிடமிருந்து பாதிக்கப்பட்டவர்களுக்கு 1056 இலட்சம் ரூபா இழப்பீடு!
இவ்வருடம் ஜனவரி முதல் செப்டெம்பர் வரையான 9 மாத காலப்பகுதியில், மோசடியான வெளிநாட்டு வேலைவாய்ப்பு நடைமுறைகளில் ஈடுபட்டவர்கள் மற்றும் அனுமதியற்ற வேலைவாய்ப்பு முகவர் நிலையங்களுக்கு எதிராக வழக்குத் தொடரப்பட்டுள்ளதாக இலங்கை வௌிநாட்டு வேலைவாய்ப்பு பணியகம் தெரிவித்துள்ளது.
பாதிக்கப்பட்டவர்களுக்கு இழப்பீடாக 1056 இலட்சம் ரூபா வழங்கப்பட்டுள்ளதாக இலங்கை வெளிநாட்டு வேலைவாய்ப்பு பணியகம் தெரிவித்துள்ளது.
பணியகத்தின் பிரதிப் பொது முகாமையாளர் நெலும் சமரசேகரவின் ஆலோசனையின் பிரகாரம், விசேட சுற்றிவளைப்புகள் மற்றும் பணியகத்திற்கு கிடைத்த முறைப்பாடுகளின் அடிப்படையில் இந்த வழக்குகள் தாக்கல் செய்யப்பட்டுள்ளன.
இதன்படி கடந்த 9 மாதங்களில் வெளிநாட்டு வேலைவாய்ப்பு மோசடியாளர்களுக்கு எதிராக நீதிமன்றத்தில் தாக்கல் செய்யப்பட்டுள்ள வழக்குகளின் எண்ணிக்கை 570 ஆகும். அந்த காலப்பகுதியில், பணியகத்திற்கு 3351 வெவ்வேறு முறைப்பாடுகள் கிடைத்துள்ளன, அவற்றில் 1177 தீர்க்கப்பட்டுள்ளன.
மேலும் இந்த காலகட்டத்தில், பணியகத்தின் சிறப்பு புலனாய்வு பிரிவினரால் நடத்தப்பட்ட சோதனைகளின் எண்ணிக்கை 19 ஆகும். 104 பேர் கைது செய்யப்பட்டுள்ளனர். அவற்றில், 17 உரிமம் பெற்ற வேலைவாய்ப்பு நிறுவனங்கள் உள்ளன.
இஸ்ரேல், தென் கொரியா, ஜப்பான், ருமேனியா, கனடா போன்ற நாடுகளில் வேலைவாய்ப்பு பெற்றுத் தருவதாகக் கூறி பண மோசடிகள் நடைபெறுவதால், பணியகத்திடம் விசாரணை செய்யாமல் இதுபோன்ற மோசடி செய்பவர்களுக்கு பணம் செலுத்துவதைத் தவிர்க்குமாறு பணியகம் பொதுமக்களுக்கு அறிவுறுத்துகிறது.
மேலும், கடந்த காலங்களில் மோசடியான முறையில் பணத்தைப் பெற்றவர்கள் இருப்பின், அவ்வாறானவர்கள் தொடர்பான தகவல்களை பணியகத்தின் 1989 என்ற தொலைபேசி இலக்கத்திற்கு அறிவிக்குமாறு பணியகம் கோருகிறது.
